நடுத்திராவிட மொழிகள்

 நடுத்திராவிட மொழிகள்

1.  தெலுங்கு

2.  கூயி

3.  கூவி (குவி)

4.  கோண்டா

5.  கோலாமி (கொலாமி)

6.  நாய்க்கி

7.  பெங்கோ

8.  முண்டா

9.  பர்ஜி

10. கதபா

11.  கோண்டி

12.  கோயா

இயல் 2, உண்டி கொடுத்தோர் உயிர் கொடுத்தோரே

இயல் 2

புறநானூறு

வான் உட்கும் வடி நீண் மதில் 

மல்லல் மூதூர் வய வேந்தே! 

செல்லும் உலகத்துச் செல்வம் வேண்டினும் 

ஞாலம் காவலர் தோள்வலி முருக்கி, 

ஒருநீ ஆகல் வேண்டினும், சிறந்த

நல்லிசை நிறுத்தல் வேண்டினும், மற்று 

அதன் தகுதிகேள் இனி மிகுதிஆள!

நீர் இன்று அமையா யாக்கைக்கு எல்லாம் 

உண்டி கொடுத்தோர் உயிர் கொடுத்தோரே 

உண்டி முதற்றே உணவின் பிண்டம் 

உணவெனப்படுவது நிலத்தொடு நீரே 

நீரும் நிலமும் புணரியோர் ஈண்டு 

உடம்பும் உயிரும் படைத்திசினோரே!

வித்தி வான் நோக்கும் புன்புலம் கண்ணகன் 

வைப்பிற்று ஆயினும் நண்ணி ஆளும் 

இறைவன் தாட்கு உதவாதே அதனால் 

அடுபோர்ச் செழிய இகழாது வல்லை 

நிலம் நெளிமருங்கின் நீர்நிலை பெருகத் 

தட்டோர் அம்ம! இவண் தட்டோரே!

தள்ளாதோர் இவண் தள்ளாதோரே!

-பாண்டியன் நெடுஞ்செழியனை குடபுலவியனார் பாடியது.

பொருள்:

வான் உட்கும் வடி நீண் மதில் 

மல்லல் மூதூர் வய வேந்தே! - வானத்தை முட்டும் அளவிற்கு உயர்ந்தும் அழகிய நீண்ட மதில் சுவர்களை உடையதுமான வளம் நிறைந்த பழமையான ஊரின் வெற்றி பொருந்திய அரசனே!

உட்கும்-முட்டும்;

வடி-அழகிய;

நீண்-நீண்ட;

மல்லல்-வளம் நிறைந்த;

மூதூர்-பழமையான ஊர்;

வய வேந்தே-வெற்றி பொருந்திய அரசனே, வலிமைமிக்க அரசனே!

செல்லும் உலகத்துச் செல்வம் வேண்டினும் 

ஞாலம் காவலர் தோள்வலி முருக்கி, 

ஒருநீ ஆகல் வேண்டினும், சிறந்த

நல்லிசை நிறுத்தல் வேண்டினும், மற்று 

அதன் தகுதிகேள் இனி மிகுதிஆள- சொர்க்கம் செல்ல விரும்பினாலும், பகைவர்களை வென்று வலிமையால் உலகத்தைக் காத்து மண்ணுலகம் முழுவதும் ஆள விரும்பினாலும், நிலையான புகழைப் பெற விரும்பினாலும் அதனை அடைவதற்கான வழி என்ன என்று நான் சொல்கிறேன், நீ கேட்பாயாக!

செல்லும் உலகம்-சொர்க்கம்;

ஞாலம் -உலகம்;

காவலர் -அரசன்;

தோள் வலி-உடல் வலிமை;

முருக்கி- வெளிப்படுத்தி;

ஒரு நீ ஆகல்- நீ ஒருவனே ஆள வேண்டும்;

நல்லிசை -நிலையான புகழ்;

நீர் இன்று அமையா யாக்கைக்கு எல்லாம் 

உண்டி கொடுத்தோர் உயிர் கொடுத்தோரே 

உண்டி முதற்றே உணவின் பிண்டம் 

உணவெனப்படுவது நிலத்தொடு நீரே 

நீரும் நிலமும் புணரியோர் ஈண்டு 

உடம்பும் உயிரும் படைத்திசினோரே!- நீரின்றி உடம்பு அமையாது. ஏனெனில், நீரால் ஆனது உணவு; உணவே உடம்பாகிறது. அதனால், உணவு கொடுத்தோர் உயிர் கொடுத்தவர் ஆவர்.  உணவு எனப்படுவது நிலமும் நீரும் சேர்வதால் விளைவதாகும்.  நீர்நிலைகளையும் விளைநிலங்களையும் இணைத்தவர், உடம்பையும் உயிரையும் படைத்தவருக்குச் சமமாவார்.

உணவின் பிண்டம் -உணவே உடம்பாகிறது;

புணரியோர் -அமைத்தவர்

வித்தி வான் நோக்கும் புன்புலம் கண்ணகன் 

வைப்பிற்று ஆயினும் நண்ணி ஆளும் 

இறைவன் தாட்கு உதவாதே அதனால் - விதைக்கப்பட்டு மழையின்றி, வானத்து மழையை எதிர் நோக்கிக் காத்திருக்கும் மிகப்பரந்த புன்செய் நிலமாக இருந்தாலும், அந்நிலத்தை ஆட்சி செய்யும் அரசனின் முயற்சியால் விளைநிலம் விளைந்து விடுவதில்லை.

அடுபோர்ச் செழிய இகழாது வல்லை -வெல்லும் போர்த்திறம் உடைய பாண்டியனே, நான் சொல்வதை இகழாமல் கேட்பாயாக!

நிலம் நெளிமருங்கின் நீர்நிலை பெருகத் 

தட்டோர் அம்ம! -பள்ளமான நிலங்கள் தோறும் நீர்நிலைகளை உருவாக்க வேண்டும்.

இவண் தட்டோரே! - அவ்வாறு நீர் நிலைகளை உருவாக்குபவரே மேற்சொன்ன மூவகை இன்பத்தையும் அடைவர். 

தள்ளாதோர் இவண் தள்ளாதோரே! - அத்தகைய நீர்நிலைகளை உருவாக்காதவருக்கு மேற்சொன்ன மூவகை இன்பமும் கிட்டுவது இல்லை.

வித்தி- விதை;

வான் நோக்கும்- வானத்து மழையை எதிர்நோக்கி இருக்கும்;

புன்புலம் -புஞ்சை நிலம்;

கண்ணகன்-மிகவும் பரந்த;

வைப்பு-உலகம்;

நண்ணி- அண்டி (உரிச்சொல்)

நண்ணி யாளும்- நிலத்தை சார்ந்து ஆளும்;

இறைவன்- அரசன்;

தாட்கு(தாள்+க) -முயற்சிக்கு;

அடுபோர் -வெல்லும் போர்

நெளி மருங்கு- பள்ளமான நிலங்கள் தோறும் 

தட்டோர் அம்ம - செய்து முடிப்பவர்;

தட்டோரே- அடைவர்;

தள்ளாதோர்- செய்து முடிக்காதவர்;

தள்ளாதோர்- அடைய மாட்டார்.

யாருக்கு சொர்க்கம் கிடைக்கும்?

யாருக்கு சொர்க்கம் கிடைக்கும்?

யாருக்கு சொர்க்கம் கிடைக்கும் என்ற கேள்விக்கு விடை பகர்கிறது சிறுபஞ்சமூலம்.

பாடல்:

குளம் தொட்டுக் கோடு பதித்து வழி சீத்து 

உளம் தொட்டு உழுவயல் ஆக்கி- வளம் தொட்டுப் 

பாகுபடும் கிணற்றோடு என்று இவ்வகைப் பாற்படுத்தான் 

ஏகும் சொர்க்கத்து இனிது.

1. குளத்தை வெட்டி
2. அதற்குக் கரை அமைத்து
3. அந்தக் குளத்திற்கு நீர் வரும் வழிகளைச் சீரமைத்து
4. உள்ளம் மகிழ்ந்து விளைநிலம் ஆக்கி
5. நீர்வளம் மிக்க பலவகைக் கிணறுகளை உண்டாக்குபவன் சொர்க்கத்தை அடைவான்.

தமிழகத்தின் நீர் நிலைப் பெயர்களும் விளக்கமும்

தமிழகத்தின் நீர் நிலைப் பெயர்களும் விளக்கமும்

அகழி- கோட்டையின் புறத்தே அகழ்ந்தமைக்கப்பட்ட நீர் அரண்

அருவி- 

மலைமுகட்டுத் தேக்கநீர் குத்திட்டுக் குதிப்பது

ஆழிக்கிணறு-

கடலருகே தோண்டிக் கட்டியகிணறு

ஆறு-

பெருகி ஓடும் நதி 

இலஞ்சி 

பலவகைக்கும் பயன்படும் நீர்த்தேக்கம்

உறைக்கிணறு- 

மணற்பாங்கான இடத்தில் தோண்டிச்சுடுமண் வளையமிட்ட கிணறு

ஊருணி -

மக்கள் பருகுநீர் உள்ள நீர்நிலை 

ஊற்று -

அடியிலிருந்து நீர் ஊறுவது 

ஏரி -

வேளாண்மைப் பாசன நீர்த் தேக்கம் 

கட்டுக்கிணறு- 

சரளை நிலத்தில் தோண்டி கல், செங்கற்களால் அகச்சுவர் கட்டிய கிணறு 

கடல் -சமுத்திரம் 

கண்மாய்- 

பாண்டி மண்டலத்தில் ஏரிக்கு வழங்கப்படும் பெயர்

குண்டம் -

சிறிதாய் அமைந்த குளிக்கும் நீர்நிலை 

குண்டு -

குளிப்பதற்கு ஏற்ற சிறுகுளம் 

குமிழி ஊற்று -

அடி நிலத்து நீர், நில மட்டத்திற்குக் கொப்பளித்து வரும் ஊற்று 

கூவல் -

உவர்மண் நிலத்தில் தோண்டப்படும் நீர்நிலை 

கேணி -

அகலமும் ஆழமும் உள்ள பெருங்கிணறு 

சிறை -

தேக்கப்பட்ட பெரிய நீர்நிலை 

புனற்குளம்- 

நீர்வரத்து இன்றி, மழை நீரையே கொண்டுள்ள குளிக்கும் நீர்நிலை 

பூட்டைக் கிணறு -

கமலைநீர்பாய்ச்சும் அமைப்புள்ள கிணறு.

சிறிய எண் அளவுகளுக்கான தமிழ்ப்பெயர்கள்

இயல் 2 

வளரும் செல்வம்

சிறிய எண் அளவுகளுக்கான தமிழ்ப்பெயர்கள்

முந்திரி-1/320

அரைக்காணி-(2/320) -1/160

அரைக்காணி முந்திரி(3/320) -3/320

காணி (4/320)-1/80

கால் வீசம் (5/320)-1/64

அரைமா (2காணி)(8/320)-1/40

அரை வீசம் (10/320)-1/32

முக்காணி (3காணி)(12/320)-3/80

முக்கால் வீசம் (15/320)-3/64

ஒரு மா (4காணி) (16/320)- 1/20

மாகாணி(1வீசம்)(5காணி)(20/320)-1/16

இருமா(32/320)-1/10

அரைக்கால் (2வீசம்)(40/320)-1/18

மூன்று மா-(48/320)-3/20

மூன்று வீசம்( 60/320)-3/16

நாலுமா (64/320)-1/5